وطن دیر
انسان اولانین جنت ماواسی وطن دیر
عشقی،هوسی،باشداکی سئوداسی وطن دیر
هرکیم سئوه آزاده لیگی یوردونوسئوسین
آزاده لیگین اصلیده معناسی ، وطن دیر
بیجا دئگی جان تک وطنی باغریما باسسام
چون کونلومون ایستکلی تمناسی وطن دیر
مجنونی یم اوز تورپاغیمین اوزائلیمین من
مجنون اولانین دهرده لیلاسی ، وطن دیر
مینتدارام اول شخصه اورَکدن گجه گوندوز
فیکری، هدفی ، مقصدی احساسی وطن دیر
دونیاده او کس بخته ور انسان ساییلر کیم
مردانه لیگی ، غیرتی دونیاسی وطن دیر
من عاشقم اوز یوردما عالم هامی بیلسین
هر بولبولون اوز نوگول زیباسی وطن دیر
( حامد ) وطنین سئومین انسانلارا نیفرت
دونیاده بو بیهوده سویوق قان لارا نیفرت